بسم الله الرحمن الرحيم
تعليق 1 : عدد الزوار :
الحمد لله وصل عدد الزوار ل 10 الاف زائر وصفحاتنا بتطلع ع الجوجل نار ، ومبروك لشباب الغرزة ولكل شباب العالم ( يلا نعمل ثورة شباب الغرزة)
تعليق 2 : احداث مصر :
صراحة اللي صار في ميدان التحرير شي عجيب ولا كان الواحد يتوقعو في الأحلام ، لا يقظة ولا نوم ، بس سبحان الله ، ويبقى وجه ربك ذو الجلال والاكرام. طبعا الاشي راح يتدرس لقدام .
تعليق 3 : احداث تونس :
انا صراحة ما سمعت في الثورة تعت تونس إلا لما شرد بن علي ، ما بعرف صراحة شكلي كنت في غيبوبة برمجية في بحر السي شارب، بس رجالة يا تونس.
تعليق 4 : ليبيا :
الله يرحم الشهداء في ليبيا وفي كل مكان ، والقذافي راح يلحقو في كل زنقة زنقة وشارع شارع وبيت بيت ويشنقوه من كراكيعو ، لكم الله يا ليبيا
تعليق 5 : اليابان :
تخيلو العالم بدون بليش او انايم ( طبعا الكويسة مش اللي بيتابعوها البعض) ، فعلا العالم بدون اليابان سيختلف عما نعرفه اليوم ، سايونارا نيوهون ، سايونارا.
ومن جهة اخرى ، مهما وصلنا من تكنلوجا وتقدم ، الكل عاجز امام قدرة الله ، سبحان الله ، والله يلطف بعباده.ويطلف بحال الناس هناك.
تعليق 6 : الشعب يريد انهاء الانقسام :
انا صراحة مش عارف كانو يهتفو "حماس وفتح ايد وحدة" ، و "سلمية سلمية" ههههه ، طبعا ايد وحدة على مين ؟ وسلمية لشو ؟ تقليد غبي صراحة.
لازم يكون الهتاف " الشعب يريد اسقاط الحزبية" او " الشعب يريد اسقاط النتانة" او "لا لراكبي الامواج" ، اكيد الشعب الفلسطيني اكبر من كل التنظيمات ، وما بيليق اي حد يعامل شعبو بالاسلوب اللي بنشوفو في غزة او رام الله ، معادلة القوة اختلفت في العالم ولازم الكل يعرف هالشي .
ايام الانتخابات ، انا سجلت وما انتخبت ، لأنو الكل مش نازلي من زور ، وفيه غيري 30% من ابناء الشعب سجلو وما انتخبو ، وفيه نسبة مش قليلة اصلا ما سجلت ، احنا المعارضة الصامتة واذا فعلا بدت تتحرك راح يسقط كل شي ، من منظمة التخرير لاوسلو للتنسيق للاعتقال السياسي والمذهبي ، ولسياسة الاقصاء حسب الافكار والمبادئ ، ولسياسة احتكار التوظيف والواسطات ، لسياسة الكذب وكذب السياسة ، لفتح لحماس لكل التنظيمات ، الشعب في مصر ما تحرك ونجح إلا لما تجاوز النظام والاحزاب والتنظيمات اللي على الساحة كلها وخلق واقع جديد ، ولليوم مش قادرين يلحقو ورا ثورة الشباب ولا راح يلحقوها ، لأنو النظام يشملهم وكلو سقط.
تعليق 7 : شعار المرحلة :
شعار المرحلة : "هكونا متاتا " وتعيش فلسطين والامة العربية الاسلامية حرة ابية من الشرق إلى الغرب حرة في كل بيت وكل شارع وكل زنقة ، إلى الأمام إلى الامام ، ثورة ثورة ثورة.
