الأربعاء، 22 يونيو 2011

ربيع الثورات - صباح الصباح


صباح اللوز

ربيع الثورات العربية كما تسميه وسائل الاعلام العربية و العالمية اطل علينا عندما قام شاب تونسي مقهور بحرق نفسه احتجاجاً على السياسات التعسفية الظالمه الممارسة في بلده و على اشياء كثيره اخرى مثل البطاله و عدم اعطاء الشباب فرصة الظهور (ولو بعرباية خضرة) و الاهانة من قبل رجالات ( و نساء ) الأمن الموقرين اطال الله (شنوبهم)

ما ترتب على ذلك كان (فوعة) في معظم, ان لم تكن كل الدول العربية.

  • مصر حرقتها بشباب ثورة 25 و كان المطلب الاساسي اسقاط النظام و العيش بكرامة (عايزيين نعيش بكرامة), اجدع ناس.
  • اليمن تعز من زمان و الضالع يطالبون بفصل الجنوب عن الشمال نظراً (للحلابة) المستمرة للثروات من قبل الشماليين, بس لما صار ربيع الثورات, اتسعت رقعة الاحتجاجات لتصل الشمال و يطالب الجميع بثروات البلد المسروقة من قبل (الأخ القائد) و الحاشية.
  • عُمان (عالسكت) طلعت مظاهرة وحدة انقمعت, و لكن السلطان (طلع صاحي و مروق التماسي) و زبط شعبه عالسريع. حركة ذكية جداً.
  • ليبيا ( توك توك و شمسيات و نظارات راي بان و الله اكبر) على فكرة في جزء من خطاب القذافي ( اول خطاب ) ما حد انتبه عليه و كان يقول فيه التالي:

في ولد من الزنتان راح غلط في ولد من الورفلة
راحت قبيلة الورفلة زعلت من الزنتان

راحوا ردوا عليهم و قالوا هادول ولاد جهّال من الاعدادي ما يعرفوش الا اكل البناني ( يعني الموز للي مخه تخين حبتين ) !!!!!!!!!!!

و عادها في آخر الخطاب كمان مره

احيــــــــــــــــــــــــــــــــــــــــــــــــــــــــــــــــــــــه يا بناني

  • سوريا …………………………… لا تعليق

وين القاسم المشترك بين الي فوق كلهم؟

رح تقلي ظلم - صح

رح تقلي قتلة – صح

رح تقلي بخافوش الله – صح

رح تقلي حرامية – صح

رح تقلي جواسيس – صح

بس القاسم المشترك الأكبر انه كلهم طلعوا علماء أحياء!!!! جميعهم يؤمن بنظرية التطور لدارون باشا و جميعهم يعتقدون ان الزعماء و الرؤساء و الملوك ( حضرة جنابهم ) هم كائنات بشرية ذات طراز رفيع و ما يحكمونه هم ( كائنات ) من فصائل حيوانية او بكتيرية او برمائية او قشرية او ( زحلماتية ) ..... الخ

واحد بطلع بقول جرذان عن شعبه

و التاني جراثيم يجب ان نجد لها وقاية

و الثالث يمكن يطلع يقول بقر, لا تصلح الا للاجترار و للحلابة و الاكل

و الرابع سحالي او إم بريص AKA بريعصة ( اقتلها بايدك بتصحلك عمرة و تلفزيون ال جي 50 بوصة – حلال )

و الخامس خنازير و يمكن ان تنقل انفلونزا لبلبول ابن الرئيس و يصير يعطس

و عد عندك يا عم الامور باقي 17 تصنيف للشعوب بالاضافة الى الخمسة المذكورة اعلاه

طب احنا الفلطسينية شو بنطلع, على حسب ما بيعرف الكل, روس بصل ( منيحة تندق على الطاولة و مع صحن فول عالصبح تسطيــــــــــــــــــــــــــــــــل و بتبيد الي قدامك لما تحكي معاه )

و في النهاية بقول, الى الأمام ايتها الشعوب العربية, ثورة ثورة ثورة

تصبحون على وطن

الثلاثاء، 21 يونيو 2011

اكتفاء ذاتي

قرأت مقالة على الحزيرة نت ، شفت العنوان قلت الحمد لله ، دخلت على المحتوى لاقيته زبالة
عنوان المقال بيقول : رغم الحصار قطاع غزة يحقق الاكتفاء الذاتي زراعيا.

http://www.aljazeera.net/NR/exeres/6D0F4647-3E3E-4B3E-8245-D5CA415FF974.htm?GoogleStatID=9

بما انه اهل غزة ادرى بشعابها ، فقناة الرأي والرأي ، جابت آراء ناس تابعين للحكومة ومحسوبين عليها

مقدمة المقال بيقول
"منذ تعرضها للحصار قبل نحو خمسة أعوام انتهجت الحكومة الفلسطينية المقالة في قطاع غزة سلسلة من الخطوات العملية في محاولة للنأي بالقطاع الزراعي عن قبضة الاحتلال الإسرائيلي والوصول إلى مستوى من تحقيق الاكتفاء الذاتي في كثير من المنتجات الزراعية التي يستهلكها أهل غزة.

ووجهت الحكومة التي تديرها حركة المقاومة الإسلامية (حماس) الاستثمار في القطاع الزراعي مما أدى إلى العودة بالنفع على سكان غزة المحاصرين، وتحقيق اكتفاء شبه كامل عبر إحلال منتجاتها من المحاصيل الزراعية مكان معظم المنتجات الزراعية المستوردة."
طبعا اللي قرآ المقدمة قال شو ، اهل غزة ما بيستوردو حاجة من اليهود ، قلنا نكمل المقال لنشوف شو اللي حققنا فيه اكتفاء ذاتي وشو اللي ما حققنا فيه اكتفاء ذاتي :
"
وعن حجم الاهتمام الذي أولته الحكومة في غزة بالقطاع الزراعي أوضح وزير الزراعة في الحكومة المقالة محمد الآغا أن القطاع الزراعي في غزة استطاع أن يصل بمعدل الاكتفاء الذاتي في الدواجن والأسماك والخضراوات كالبطيخ والشمام والبصل والثوم والجزر وغيرها من المحاصيل إلى ما فوق 98%.
....
ودلل الوزير على حديثه بالقول إنه في السنوات السابقة كان يتم استيراد ما بين 20 و30 ألف طن من البطيخ سنويا، لكننا أنتجنا العام الماضي 35 ألف طن، ومن المتوقع في هذا العام أن تصل كمية الإنتاج إلى 40 ألف طن سنويا، وهو يغطي الاحتياج المحلي بالكامل."
مجالات الاكتفاء الذاتي :
- الدواجن - الاسماك - الخضروات (بطيخ ، شمام ، بصل ، ثوم ، جزر) .
الدليل انو فيه بطيخ وبطيخ وبطيخ وبطيخ مليان في السوق ؟؟؟ وراح نزرع بطيخ في كل بيت وكل حارة وكل زنقة.
مجالات عدم الاكتفاء الذاتي :

"ورغم تحقيق قطاع غزة اكتفاء ذاتيا في بعض القطاعات الزراعية، فإن مساحة القطاع التي لا تتعدى 350 كيلومترا مربعا، تستأثر المباني السكانية بأجزاء واسعة منها، لا تسمح بتحقيق الاكتفاء في قطاع الحبوب والأعلاف التي تعد من أكثر القطاعات الزراعية حيويةً للسكان."
"لكنه أشار في الوقت نفسه إلى أن الاكتفاء المتحقق في بعض المحاصيل الزراعية في القطاع نسبي وليس كاملا بسب احتياجات سكان قطاع غزة التي تفوق القدرة الإنتاجية في بعض المحاصيل جراء محدودية الأراضي الزراعية." ( الكلام لابو رمضان)!

عنوان المقالة متناقض مع المحتوى ، من اي ناحية ممكن تنظر ، وعيب على قناة زي الجزيرة تلفق اخبار وتحاول تعيد صياغتها بهالشكل المزري، الكل عارف انو 80% من الناس تقريبا بتقرأ العنوان واول سطرين وبتسكر الخبر!
ناس بتقول متحامل ، وناس بتقول ما بدو الخير ... انا بقول ، اللي بدو الخير إلى بيقلي عن مشاكلي وبيطرح مشاكلي على الرأي العام المحلي والعالمي لحتى نلاقيلها حل ، اما اللي بيعملي البحر طحينة هاد واحد منافق ما بيستاهل مني اي حاجة سوى اني افضحو.

قال اكتفاء ذاتي قال ، وكأنو الناس راح تعيش على البطيخ والجزر والثوم !
وإذا هاد معايير الاكتفاء الذاتي ـ كان المفروض كتبو مقالة عريضة عن مجالات التقدم والاكتفاء الذاتي العالي جدا اللي موجود في الدول العربية! 


الأحد، 12 يونيو 2011

بدي اشتغل واخدم بلدي

كما يقال ، كل داء له دواء يستطب به إلا الحماقة أعيت من يداويها .
تخرجنا من الجامعة ، ورفعنا لواء العمل من اجل الوطن ، راح الوطن دار ** النا وقال ***** ، معذرة لمقص الرقيب
طبعا اسهل شي في غزة وفلسطين بشكل عام نروح نعلق كل مشاكلنا على الاحتلال ، لأنو اللي ما بدو يشوف المشكلة بيهرب منها.
خلينا نسأل السؤال ، بعيدا عن الواسطات ، والتزكيات وغيرو ، انت كمهندس المفروض لحتى تبني بلدك تشتغل فيها ، احنا في فلسطين كل العقول بتتهجر برا البلد ، والسبب سياسي بالدرجة الاولى ، ولأنو انت ما بتسبح بحمد احد التنظيمات الموجودة على الساحة فانت لا راح تلاقي شغل ولا راح تحصل حتى على فرصة لحتى تقدم على شغل.
انا كواحد من هالخريجين الجداد ، فعلا رفضت اسافر برا البلد ، لأنو كنت بتلهف ع شغلة اسمها "اكون مواطن" واحصل على فرصتي في بلدي ، طبعا اصدمت بموضوع الواسطات ، المقابلات الوهمية ، الوظائف التنظيمية والحزبية ، الغش ، انا حسيت حالي غريب واجنبي في بلدي ، كانت النتيجة الطبيعية بعد 3 سنوات اني طلعت برا ، مش لأني يئست لا ، لأنو انا انسان حر وبدور ع كرامتي اللي راحت تحت رجلين هالناس المتنفذة في هالبلد ، ومعادنا يوم عند رب العباد.
ال3 سنوات من حياتي راحت وراحت من حياة شباب كتير ، لكن اللعنة والمرارة بعد ما تسافر وتبدا حياتك الوظيفية في بلد غير بلدك واللي انت فيها كأجنبي بتتعامل معاملة احسن من معامتلك كمواطن في بلدك ، بتلاقي ناس اعمارهم اقل منك بسنة وسنتين وثلاثة ، وعندهم خبرة أعلا منك وحاصلين على مسميات في الشركة اعلا منك ، مش لعيب فيك بالعكس ، لكن لأنو انت متأخر عن سوق العمل بالقدر اللي كنت فيه في بلدك بتحاول تخدمها...طبعا لو ما سافرت وما حصلت شغلانة زي الخلق والناس كان ما حسيت فعلا شو اللي صار وكيف هالبشر اللي متحكمين فينا عملو فينا .
فيه دول نامية معدلات البطالة فيها 40% ونسبة الفقر فيها 70% وفيها قرى لليوم ما بيعرفو شو هيا الكهربا وقاعدة بتعتني بالخبرات اللي عندها لأنو بدها تتقدم وتتطور، اما احنا ولا فخر من اقل معدلات الأمية في العالم ، كل بيت تقريبا فيه انترنت ، والاهم كل بيت تقريبا عايش ع المساعدات ،اي نعم ، سياسيينا وتنظيماتنا ربونا على الشحاتة وانو احنا شعب شحات ، فانت مش بحاجة انك تشتغل ولا تخلق فرص عمل في البلد بقدر ما ترخص جمعيات وتقطع ايدك وتشحت عليها وتصور غرفة تم قصفها من 30 زاوية وتنشرها في كل وسائل الإعلام وتعمل ألها صفحة ع النت عشان تلم التبرعات عليها .
إن كان فعلا الاحتلال هو السبب ، واليهود هما اللي بدهم يعملو فينا هيك، فانا بقول اليهود نجحو مليون في المية، مش من شطارتهم ، لكن من خيابتنا .
شو بتتوقع من بلد بتطرد الناس الفهمانة اللي فيها ، وبتربي الناس فيها على الكابونات ، وبتلم صغارنا وبتعلمهم كيف يكون مخلص للحزب والتنظيم اكتر من ابوه واخوه ودينو وبلدو.
وتصبحون على وطن