الجمعة، 3 يوليو 2009

مايكل جاسكون...!

مايكل جاكسون مات اخيرا زي مصير اي كائن حي في هالدنيا ، طبعا الكل عارف وما فيه لازمة للكلام الكتير في الموضوع.
القصة وما فيها بأتذكر وانا صغير من اول ما وعيت وكان هالزلمة مشهور خير الله ، الكل يجيب في سيرته ويسمع فيه وطبعا اللي ما سمع فيه من صغره بيكون مش في هالدنيا عايش ، بأتذكر كيف دايما يجيبو سيرته أنه ما عجبته خلقه الله يعني انو اسود فراح عمل عملية تجميل خلى حالة ابيض ، طبعا هاد الكلام كنا نسمعه في قعدات الشباب وعلى منابر الجوامع وحتى في المدارس ..
طبعا احنا عرب ومعروف عنا انو عايشين على الاشاعات والكذب والكلام الفاضي ، انا شخصيا هادي معلوماتي كانت... لكن ما كنت مقتنع فيها ، هل فيه عملية تجميل بتخلي الاسود ابيض .؟
احتمال يكون فيه ، لكن هاد السؤال اللي كان يجول في فكري وانا صغير.... بعد ما سمعت بموت مايكل جاكسون قلت لازم بعد 20 سنة من هالسؤال اللي مالاقيتله جوال ادور عليه اليوم .. وفعلا بعد 3 ايام بحث على الانترنت اتضح يا اسيادنا الاعزاء انو كل القصص الي كنا نسمعها بخصوص هالزلمة طلعت كذب ... عادي كذبة من 20 سنة الواحد مقتنع فيها او هي المعلومة اللي حواليه وصلولو اياها ، صحيح ممكن تكون تافهه او ما إلها لازمة عند كتير من الناس لكن لو قسنا الامور على ابس مقاييسها إنو احنا فعلا العرب عنا كذبات كثيرة حوالينا مقتنعين فيها وبنتصرف على اساسها وطبعا مجتمعنا المريض المبني على القيل والقال والنميمة اللي دينا نهانا عنها هو اللي ادى فينا لهالحال الزبالة.
زي قصة اللي قسمو البير بالعصا واللي صنفو البلد فوق وتحت وكلها شارع ، او حتى على مستوانا اليوم بنوخد يوم عيد الاستقلال واحنا الارض الوحيدة في العالم المحتل لليوم وبنوخد اجازة وبنصدق حالنا ..

طبعا بالرجوع لقصة مايكل جاكسون ، هالزلمة الاسود صار عنده مرض اسمه البهاق ، طبعا كونا فلسطينية فرئيس دولتنا المستلقة السابق على فرض هههه ، كان عنده البهاق وكان اسمر واخر ايامه صار ابيض مني طبعا ، مايكل كان عنده نفس المرض وطبعا بحكم انو مغني مشهور كان لازم يخضع للعلاج والعلاج كان نتيجته انو تتسرع عملية المرض وبدال ما يصير بقع في الجسم طغى على كل الجسم وصار ابيض مبقع ، ولحقتها كزا عملية تجميل مشان يزيلو البق وبالتالي انتهى الزلمة حاله بأنه ابيض ، وطبعا من اغانيه ضل متمسك بأصله الاسود لآخر يوم في حياته اللي كانت 50 سنة ، طبعا 20 منهم كنت انا بفكر انو حطوه في كبسولة اكسجين وقلب حالو ابيض عشان بدوش يكون نيجار فور لايف هههههه . الحقيقة حلوة لما الواحد يعرفها وطبعا بخلي الواحد يطلع ويعيد نظر في كل معلومة بتوصله سواء على الايميل او ع الويب او ع التلفزيون وطبعا اكيد من الناس لأنه ما لم يكن له مصدر ثابت وصحيح فهو اشاعه وما اكثرها في مجتمعنا الفلسطيني .
طبعا الايميلات التسلسلية اللي مشهورة كمان والمأخوذة من قصص اللعنات التايلندية لازم ما حد ينشرها ، وكلنا اكيد وصلنا منها كتير ، اعمل كذا وكذا وابعتها لغيرك عشان يصير كذا وإلا كذا .. طبعا كلها افتراءات وكذب واحيانا فيها احاديث موضوعة او مكذوبة .
النقطة الاخيرة.... فعلا لازم ننضج فكريا..بكفي اللي صار فينا في فلسطين ويا ريت نكون عبرة للكل ولاجيال المستقبل هاد اذا كان فيه مستقبل من اصلوا!

للمزيد حول مرض البهاق شوفو الحج وكيبيديا
http://en.wikipedia.org/wiki/Vitiligo

سايونارا